أحول

مرة واحد أحول عنده حمامة حولة حب يدخلها القفص.. حطها برة القفص.. وجت تهرب راحت داخلة جوة القفص.

جواب

مرة واحد مجنون كان بيكتب جواب فدخل الدكتور عليه قاله بتعمل ايه.. قاله بكتب جواب لنفسي فقاله الدكتور.. بتكتب فيه ايه فرد عليه المجنون وقال.. يامجنون هو لسة جالي عشان اعرف.

البانجو

واحد غبي معاه 150 جنيه. قاعد يقسمهم ويقول 50 جنيه للسكن، 50 جنيه للأكل، و50 جنيه للبانجو.. شوية والباب خبط.. مين.. افتح بوليس.. راح مقطع الخمسين جنيه بتاعة البانجو.

كان مرة واحد كل يوم يحلم بماتشات عصافير فراح للدكتور.. وقال له على اللى بيحصله والدكتور قاله خد الدواء ده النهاردة رد عليه.. وقال له استنى عشان النهاردة الماتش النهائى.

حرامى

في واحد حرامى والتانى ندل.. فالندل بيقول للحرامى علمنى السرقة.. فسرق محفظة واحد.. وقال له.. أهو علمنى انت بأة الندالة.. راح مسكوا وقال حرامى.

بلياردو

أغبيه راحو يلعبو بلياردو.. واحد منهم وقف فوق الطرابيزة وقال لهم انا الجوووون.

عربية

مره واحد بيسوق عربية شاف يافطة مكتوب عليها ( خفف 100 ك) راح مخفف 100 ك.. قابل يافطة تانية مكتوب عليها (خفف 50 ك) راح مخفف50 ك .. قابل يافطة مكتوب عليها "اهلا بكم في مدينه خفف"

غبى جدا

واحد غبى جدا حكموا عليه بالاعدام.. بعد ما علقوه فى المشنقه قعد يشاور ويخبط بأيده ورجليه ففكروه عاوز يقول حاجه مهمة.. ففكوه ونزلوه بسرعة.... فبص لهم وقال: ياجزم كنت هتخنق.

غبى

مرة واحد غبى ماشى فى الشارع قابل قرد فمشي بيه.. قابل عسكرى مرور.. سأله أودي القرد ده فين.. العسكرى قال له.. وديه جنينة الحيوان.. تانى يوم عدى الرجل بالقرد العسكرى قال له.. مش قلتلك وديه جنينة الحيوان قال له.. ما أنا وديته امبارح النهاردة بقى هاوديه السينما.

مجانين

مره اتنين مجانين اتفقوا انهم يهربوا من المستشفى واحد قال للتانى لو لاقينا الصور عالى نهده لو لاقيناه واطى يبقى ننط من فوقيه.. التانى قاله ماشى.. راحوا مالاقوش صور خالص قالوا يخساره المهمه فشلت.

إضحك

- غبي معدي من امام مزرعة ابقار حب يعرف ازاي البقر بيتزرع .. فدخل يسأل قالوا له تجيب شوية سكر وترشهم على الارض وتاني يوم هتلاقي البقر طلع.. عمل الغبي زي ما الراجل قاله، صحي تاني يوم لقى نمل مكان السكر فرح جداً.. وقال يا حلاوة البقر وهو صغير.

- مرة واحد راكب حمار فعدى على بنزينة فلقى العربيات كل ما يتحطلها بنزين تطلع تجرى راح دخل البنزينة .. وقال للراجل حط للحمار عشرة لتر بنزين عشان يجرى.. فأول ما حط للحمار بنزين طلع يجرى ويرفس ويتشنج وجرى بعيد .. قام الراجل قاله له حطلى انا بقى عشرين عشان الحقه.

- مره واحد غبي راح السينما هو ومراته واول ما النور طفى قال لها قومى يا وليه شكلهم هيناموا.

- جماعه ارهابيين أغبياء حبوا يفرقعوا مدرسة فحطوا قنبلة فى الدور الاول واستخبوا فى الدور التانى.

- واحد ركب مترو الانفاق .. جاله الكمسرى بيقول له تذاكر ... قال له امين شرطة... فسابه وراح للى جنبه وقال له: تذاكر ... قال له: امين عبد الجواد.

- مرة أغبية سافرو امريكا واحد منهم رجع والتانى مرجعش... فواحد سألة فين صاحبك؟، قال له ده اول ما راح هناك اتجنن من ناطحات السحاب وطلع عمارة 500 دور ... ورمى نفسه من الدور الـ 500 ونزل فى 3 ايام ..... قال له ومات، قال له انت عايزه ينزل فى 3 ايام من غير اكل ولا شرب وما يمتش.

نكت على كيفك

- كان فى مرة فيل كل يوم يمشى يدوس على النمل فالأستاذ فوزى قائد النمل عمل اجتماع وقال لهم : احنا لازم نموته .. فاتقسموا مجموعتين مجموعة نطت على جانبه اليمين .. راح باعدهم ومجموعة نطت على الشمال .. راح باعدهم .. وفضل فوزى فى النص .. فجميع النمل من تحت قعد يزعق ويقول: موته يا فوزى موته يا فوزى.

- مجموعة صيادين بيصطادو وكل ما يصطادو حاجة كلابهم تجري تجيب الفريسة ما عدا كلب واحد بيخاف من صوت الرصاص فقالوا لصاحبه خده الافراح اللي بيحصل فيها ضرب نار كتير عشان يتعود على الرصاص.. وبعد ما اخده لمدة 6 شهور رجع يصطاد تاني أول ما ضرب نار الكلب قعد يزغرط.

- سواق تاكسي قعدت جنبه بنت حلوة قوي قاللها : تعرفي تسوقي؟..قالت له : لأ.. قالها : أنا تسوقي.

- اتنين مساطيل طلبت معاهم ان اول واحد هيعدى من الشارع يقطعوا رقبته ويلعبوا بيها كورة فلقوا واحد معدى من الشارع وكان مسطول اكتر منهم المهم فوقفوه وقالوا له احنا طلبت معانا نطير رقبتك ونلعب بيها كورة راح مطلع سكينة وضربها فى دماغه وقالهم ده انا افسيها قبل ما تلعبوا بيها.

- مرة مدرس سأل الاطفال فى الفصل وقال اللى يفتكر نفسه غبى يقف .. بعد شويه وقف تلميذ .. فسأله المدرس وليه بقى يا سيدي بتفتكر نفسك غبي .. فرد عليه التلميذ اصلي ماحبتش اشوفك واقف لوحدك يا أستاذ.

- مرة واحد بخيل اوى بعت ابنه يشترى له بعشرة صاغ جبنة .. راح الواد ورجع بعد شويه وقاله بابا البقال بيقولك تعال الحس السكينة.

- مرة واحد قال لصاحبه: بالي مشغول من امبارح قاله يمكن حد رافع السماعة.

- مرة استاذ سأل طالب في أي فصل يسقط المطر قال له في الفصل اللى مالهوش سقف.

- مرة كان في ماتش بين فريقين حشرات في الشوط الاول في فريق انهزم واحد صفر والشوط الثاني نزلت أم أربعة واربعين فدخلت 42 هدف.. فبعد الماتش صحفي بيسأل المدرب اللي فاز: ليه مانزلتش أم أربعة وأربعين من أول الماتش قال له: كانت بتربط الجزمة.

- مرة جاموسة جالها جفاف جابت لبن بودرة.

- مرة اتنين مساطيل قاعدين في الاستاد فواحد بيقول للتانى.. تلف الاستاد ده فى قد ايه رد عليه .. في سجارتين.

- مرة واحد ماذون مش لاقي شغل طلق مراته.